გიორგი ვარდოსანიძე: "ერთმანეთისთვის ტკივილის მიყენებას მეგობრებად დარჩენა ჯობდა"

ქართულ ტელესივრცეში ერთ–ერთი ყველაზე რეიტინგული და სანახაობრივი შოუს "ცეკვავენ ვარსკვლავები" მესამე სეზონის დაწყება კითხვის ნიშნის ქვეშ დგას. მიზეზი მარტივია – ქართულ რეალობაში არც იმდენი "ვარსკვლავია", რომლებსაც სურვილი და მონაცემები აქვთ, რომ სამთვიან საცეკვაო მარათონში ჩაებან. მათი დეფიციტი უკვე მეორე სეზონის დროსაც საგრძნობი იყო, მაგრამ ეს არ არის ის თემა, რომელზეც ამ სტატიაში ვისაუბრებთ. ამჯერად ყურადღებას შევაჩერებთ იმ ტენდენციაზე თუ უბრალოდ დამთხვევაზე, რაც "ცეკვების" პარალელურად გამოიკვეთა.
ეკრანზე შესრულებულ ცეკვებს – ვნებიანს, ლამაზს, დახვეწილს და ზოგჯერ კომიკურსაც, "ვარსკვლავებისთვის" მოაქვს პოპულარობა, ახალი შესაძლებლობები, ზოგისთვის – ბინა, მანქანა, სანაცვლოდ კი, როგორც ჩანს, პირად გრძნობებს ითხოვს. უცნაურია, მაგრამ ორი სეზონის განმავლობაში ბევრმა მონაწილემ დაკარგა საკუთარი ბედნიერება. ცეკვებმა ოთხი შეყვარებული წყვილი შეიწირა – რუსკა მაყაშვილი და გიორგი ყიფიანი, ნუკი კოშკელიშვილი და ოთო მარგოშვილი, ეკო ფანგანი და ბექა ჩხაიძე, გიორგი ვარდოსანიძე და თამთა შალამბერიძე. თითოეული მათგანი პოპულარულ შოუს სიყვარულის დაკარგვაში პირდაპირ არ ადანაშაულებს, მაგრამ ირიბად – კი.
სპორტული სამეჯლისო ცეკვების რიტმის ქვეშ ისინი რთულ მდგომარეობაში აღმოჩნდნენ. მკაცრმა რეჟიმმა თუ რაღაც სხვამ მათ პრობლემები მოუტანა პირად ცხოვრებაში. დამნაშავეა თუ არა ვნებიანი ტანგო წყვილების დაშორებაში, დასკვნა თქვენთვის მოგვინდია, მაგრამ რაღაც იდუმალი ძაფები ცეკვებსა და სიყვარულში იმედგაცრუებას შორის უთუოდ არსებობს.
...
რუსკა მაყაშვილი: "ჩვენ შორის არ ყოფილა მესამე პირი, უბრალოდ ასე მოხდა"
მსახიობმა რუსკა მაყაშვილმა და გიორგი ყიფიანმა ერთმანეთი 2003 წელს გაიცნეს და იმისათვის, რომ ერთმანეთი აღმოეჩინათ, წლები დასჭირდათ. მეორედ ერთმანეთს 7 წლის შემდეგ შეხვდნენ და გრძნობებმა სწორედ მაშინ იფეთქა. ცნობილი ფეხბურთელის, დავით ყიფიანის უმცროსი ვაჟის და პოპულარული ახალგაზრდა მსახიობის სასიყვარულო კავშირი ყოველთვის დიდ ინტერესს იწვევდა. ისინი ყველგან ერთად ჩნდებოდნენ – საზოგადოების თავშეყრის ადგილებში, პრემიერებზე, ჟურნალების ყდებზე. მათ ერთად ითამაშეს ფილმში "გული პლუსი". რუსკა ამ ფილმის პრემიერაზე ამბობდა: "ასაკში რომ შევალთ, ეს ფილმი ჩვენი სიყვარულის ფილმად დარჩება, საოჯახო ფილმი გვექნება. გიორგიც ამბობს, რომ ძალიან მაგარი იქნება, როცა მას ჩვენს შვილებთან და შვილიშვილებთან ერთად ვნახავთ, იმედია, ყველაფერი ასე იქნება".
რუსკა და გიორგი არასოდეს გაურბოდნენ საერთო მომავალზე საუბარს. ერთ–ერთი ვალენტინობის დღე რუსკამ ძალიან ორიგინალურად მიულოცა შეყვარებულს. სასიყვარულო ბარათი დაახვედრა, რომელშიც ეწერა: "გიორგი, ბევრი ვიფიქრე და მივხვდი, რომ მშვენიერი საბაბი მომეცა შენთვის წერილის მოსაწერად... 14 თებერვალია... სიყვარულის დღე და თან ჩვენი ფილმის პრემიერა. ჩავჯექი ტაქსში, ფანჯრიდან ვხედავ, როგორ დადიან ხელჩაკიდებული გოგონები და ბიჭები, შიგადაშიგ ბიჭები და ბიჭებიც. ამოიჩემეს ეს 14 თებერვალი და დადიან ტუჩებზე ერთნაირი სასაცილო, სულელური ღიმილებით და თითო ვარდით. ვარდები არ მიყვარს, მე რომ მქონდეს ჩემი ქალაქი პატარა სახლებითა და პატარა ბაღებით, დიდხანს ვიქანავებდი შენთან ერთად საქანელაზე. მერე სიცივისგან გაყინულები წამოვიდოდით ჩვენს პატარა სახლში, დავსხდებოდით რბილ დივანზე, ცხელი კაკაოთი და ტკბილი ბურბუშელებით ვუყურებდით შენი საყვარელი გუნდების თამაშს ჩვენს დიდ ტელევიზორში. რა თქმა უნდა, ბედნიერება მარტო ტელევიზორი და რბილი დივანი არ არის, მაგრამ ჩვენ ესეც გაგვიხარდებოდა და კიდევ ერთხელ გავიფიქრებდი, რომ როგორ სხვანაირად მიყვარხარ. იმას გეტყვი, რასაც შენ მეუბნები ხოლმე – მიყვარხარ ისე, როგორც არავის არავინ არასოდეს ჰყვარებია".
ასეთი წერილის შემდეგ, რომელიც რუსკამ თავის ვებგვერდზე გამოაქვეყნა, ბევრი მათ სიყვარულს ერთგვარ ეტალონადაც თვლიდა. ამ ხნის განმავლობაში არასოდეს გავრცელებულა ჭორები ვინმე "მესამეზე". ერთად თითქმის 3 წელი გაატარეს. რუსკა "სარკისათვის" მიცემულ ერთ–ერთ ინტერვიუში ამბობდა:
"ჩვენს სიყვარულში არ არსებობს არანაირი სტრატეგია, ყველაზე მთავარი ის არის, რომ ერთმანეთი ძალიან გვიყვარს. თუ გარკვეული კონფლიქტები წარმოიშვება, ვცდილობთ, ის მაშინვე გავანეიტრალოთ, რომ უთანხმოებამ არაფერი გვავნოს. რა თქმა უნდა, ისედაც ნათელია, რომ ყველაფერი ქორწინებამდე მივა. მე ვარ მისი საცოლე და ის – ჩემი საქმრო, მაგრამ ამ სიტყვებით ლაპარაკი არ მიყვარს, არც იმაზე ვფიქრობ, "დროზე" გავთხოვდე. მინდა, რომ ასეთი ურთიერთობა რაც შეიძლება მეტ ხანს გაგრძელდეს, მაგრამ, რა თქმა უნდა, "მარაზმში" არ უნდა გადავიდეს. არ მომწონს, როდესაც შეყვარებულები 7 წელი წელავენ ურთიერთობას".
ყველა მათი ქორწილის მოლოდინში იყო, თუმცა ერთხელაც აღმოჩნდა, რომ ისინი სხვადასხვა ნაპირზე იყვნენ – სიყვარული დასრულდა. რუსკა, რომელიც აქამდე ბევრს ლაპარაკობდა თავის გრძნობებზე, მერე ყველაზე ჩაკეტილი ადამიანი გახდა. ის ან არაფერს ამბობდა ამ დაშორებაზე, ან მოკლე კომენტარით შემოიფარგლებოდა: "დავსხედით, ვილაპარაკეთ და დაშორების გადაწყვეტილებამდე ერთობლივად მივედით. ახლა აბსოლუტურად ჩვეულებრივი ურთიერთობა გვაქვს, ვმეგობრობთ, აქ არ ყოფილა მესამე პირი, უბრალოდ ასე მოხდა და რას ვიზამთ".
ეს ამბავი პროექტის "ცეკვავენ ვარსკვლავები" პირველსა და მეორე სეზონებს შორის მოხდა. პირველ სეზონზე რუსკა წამყვანი იყო, მეორე სეზონზე კი – მონაწილე და ფინალში გამარჯვებული. როგორც ამ დროს ხდება ხოლმე, პირადში განცდილი მარცხის შემდეგ ქალები მთლიანად საქმეზე გადაერთვებიან და ეს ცეკვებზეც აისახა. გარდა ამისა, გიორგისთან დაშორების შემდეგ კარიერული მდგომარეობა გაიმყარა. ის დღეს ყველგან არის – თეატრშიც, კინოშიც და ტელევიზიაშიც, პლუს ოროთახიანი მშენებარე ბინა ბათუმში, რომელიც მან პრიზად მიიღო.
...
გიორგი ვარდოსანიძე: "ერთმანეთისთვის ტკივილის მიყენებას მეგობრებად დარჩენა ჯობდა"
ახალგაზრდა მსახიობ გიორგი ვარდოსანიძეს პოპულარობა სერიალმა "გოგონა გარეუბნიდან" მოუტანა. ბევრს გული დასწყდა, რომ ახალ სიმპათიურ სახეს უკვე ჰყავდა რჩეული. გიორგიმ თავისი შეყვარებული "სარკესთან" მალე გამოაჩინა – თამთა შალამბერიძე, მისი კოლეგა, ანუ მსახიობი. ერთმანეთი ფილმ "ოცნების ქალაქის" გადაღებებზე გაიცნეს. ინტერვიუში გიორგი ამბობდა: "პირველი დანახვისთანავე მოვიხიბლე კი არა, "გავჭედე". იქ უამრავი მოდელი, ლამაზი გოგო ტრიალებდა, მაგრამ, თამთა რომ დავინახე, გარშემო ყველა და ყველაფერი წაიშალა, გადავირიე..."
მათი სიყვარულის ისტორია 3 წელი გაგრძელდა. როგორც კი გიორგი პროექტში "ცეკვავენ ვარსკვლავები" მეორე ადგილზე გავიდა, ერთ კვირაში თქვა, რომ მისი, როგორც შეყვარებულის, სტატუსი შეიცვალა: "მყავდა რჩეული და დასრულდა სიყვარული. ჩვენი დაშორების მიზეზი არ ყოფილა კონფლიქტური, უბრალოდ სხვადასხვანაირად ვაზროვნებდით, გვერჩივნა, რომ დავშორებულიყავით და დავრჩენილიყავით კარგ მეგობრებად, ვიდრე ერთმანეთისთვის მეტი ტკივილი მიგვეყენებინა".
ამ წყვილის დაშორებას ბევრი ჭორი მოჰყვა. ინტერნეტსივრცეში მუდმივად წერდნენ, რომ მათი დაშორების მიზეზი მესამე ადამიანი იყო, კერძოდ კი, გიორგის პარტნიორი ცეკვაში სალომე ჭაჭუა. როგორც ჩანს, მათი ვნებიანი ცეკვები ზოგმა იმაზე მეტად აღიქვა, ვიდრე ხელოვნება. რა თქმა უნდა, ეს ჭორები ორივე მხარემ უარყო. სალომე დღემდე თავისი შეყვარებულის, მოცეკვავე გიგი გაჩეჩილაძის გვერდითაა. გიორგი კი თვლის, რომ ამ პროექტმა გარკვეულწილად უარყოფითი გავლენა მართლაც იქონია მის პირად ცხოვრებაზე.
– უბრალოდ დამთხვევაა ის, რომ ჩემი სიყვარული მაშინ დასრულდა, როცა ამ ცეკვებში გავიმარჯვე. ალბათ ამ პროექტის ერთადერთი დანაშაული იმაში მდგომარეობს, რომ ძალიან დაკავებული ვიყავი – ცეკვები, თეატრი. თამთას კი იმდენ დროს ვეღარ ვუთმობდი, არადა მანამდე 24 საათი ერთად ვიყავით. ალბათ ამანაც ცუდი როლი ითამაშა, – ამბობდა "სარკისთვის" მიცემულ ინტერვიუში მსახიობი.
...
ნუკი კოშკელიშვილი: "ოთოსთან საოცარი 2 წელი გავატარე"
მოდელისა და ტელესახის ნუკი კოშკელიშვილისთვის ცეკვები არცთუ იღბლიანი აღმოჩნდა. მართალია, მაყურებლებისგან დიდი სიმპათიები დაიმსახურა, მაგრამ პირველი სეზონის პროექტს შუიდან მაინც გამოეთიშა და მას შემდეგ ყველაფერი აირია, როგორც პირად ცხოვრებაში, ასევე კარიერაში. სანამ სცენაზე მონდომებით ცეკვავდა, მანამდე მას შეყვარებული ლოჟიდან გულშემატკივრობდა, მის რეპეტიციებსაც ესწრებოდა. ნუკი ამბობდა, რომ ძალიან გაუმართლა, რადგან მის გვერდით ოთო იყო. ყოველთვის აღნიშნავდა, რომ ცეკვის დროს შეყვარებულისგან განსაკუთრებულ მხარდაჭერას გრძნობდა.
– ცეკვების დროს ჩემი შეყვარებული ხელახლა აღმოვაჩინე. ის ისე მიდგას გვერდში, როგორც არც ერთს არავინ. ამის გამო ყველაზე მაღლა მაქვს თავი აწეული, არ იცით, რას აკეთებს ჩემ გამო! ფეხსაცმლის ძირებს მიხეხავს, რომ არ გამიცურდეს, სულ იმას მეკითხება, ხომ არ გშია, ხომ არ გწყურია, ძალიან გვივლის მეც და ჩემს პარტნიორ ოთოსაც ("ცეკვებში" მისი მეწყვილე ოთო ფოლადაშვილი. ავტ.), – ამბობდა "სარკესთან" ბედნიერი ნუკი.
ოთო მისთვის ახდენილ ოცნებასავით იყო – თურმე ნუკი ბავშვობიდან გიჟდებოდა ქერა, ცისფერთვალება ბიჭებზე. ისინი ერთმანეთს ნუკის დედამ გააცნო, ოთოს დედა მისი მეგობარი გახლდათ. შევარებულები მომავალ ქორწილზე არასოდეს საუბრობდნენ, ნუკი ამბობდა დაგეგმილი არაფერი გვაქვს, ჯერ არ ვფიქრობთ ამაზე და ამით ვართ ბედნიერებიო. წყვილის დაშორების მიზეზი აქაც ბუნდოვანი და გაუგებარია.
– ძალიან რთულია იმის თქმა, თუ რა გახდა ჩვენი დაშორების მიზეზი. ზოგჯერ გგონია, რომ კომფორტია, როცა გიყვარს და უყვარხარ, ზოგჯერაც კომფორტი მარტო ყოფნაა. ცვალებადია ეს ყველაფერი, დღეს ვარდისფერი მოგწონს, ხვალ შეიძლება იისფერი მოგეწონოს, ასეა პირადი ცხოვრებაც. ზოგჯერ ყვავილები და რომანტიკა გიტაცებს, ზოგჯერ უბრალოდ გინდა, რომ კარგი მეგობრები იყოთ. დღეს ოთოსთან გატარებული დრო ფანტასტიკურად მახსენდება. მასთან საოცარი 2 წელი გავატარე. ჩვენ რომ ამ ეტაპზე დაშორების გადაწყვეტილება არ მიგვეღო, ყველაფერი ცუდად დასრულდებოდა. მეგობრობის სურვილი არც ერთს გვექნებოდა, – ამბობდა ნუკი "სარკეში".
შეყვარებულის დაკარგვასთან ერთად ის ტელევიზიაში დილის პროგრამასაც დაემშვიდობა. ამ ეტაპზე მთლიანად ახალ პროექტებზეა გადართული და, როგორც ამბობს, ყველანაირად ეცდება, ეკრანს მეტი შემართებით დაუბრუნდეს.
...
ეკო ფანგანი: "ჩვენი დაშორება იყო ინტერესთა კონფლიქტები"
ეკო ფანგანი და ბექა ჩხაიძე ქართულ შოუბიზნესში პოპულარული წყვილის სტატუსს კარგახანს ატარებდნენ. მათი რომანი საერთო საქმითაც იყო შეკავშირებული – ბექა ანსამბლ "ალილოს" წევრი გახლავთ, ეკო – ამ ანსამბლის პროდიუსერი და პიარმენეჯერი. მათი სიყვარული სავსე იყო როგორც სიურპრიზებითა და რომანტიზმით, ასევე ჩხუბითა და გაბუტვებით. იყო შემთხვევა, როდესაც მათთან ერთობლივი ინტერვიუს ჩაწერა სწორედ ამ მიზეზით არ მოხერხდა – ერთმანეთთან უბრად იყვნენ.
ამბობენ, როცა ეკო პროექტში "ცეკვავენ ვარსკვლავები" გამოჩნდა, ბექასთან მისი ურთიერთობა მაშინ დაიძაბაო. თუმცა სანამ ეკო საცეკვაო მოედანზე დასრიალებდა და ჟიურისგან საქებარ სიტყვებს იღებდა, ბექა თითქმის ყოველთვის მაყურებელთა შორის იჯდა და შეყვარებულს ემოციურად გულშემატკივრობდა.
ეკოსა და ბექას რომანი სიმღერითა და ცეკვა–თამაშით დაიწყო. გაცნობიდან მეორე დღეს ბექა მეგობრებთან ერთად ეკოს სახლს მიადგა ფიალებში ანთებული ცეცხლითა და გიტარით ხელში.
– ბექა მის მეგობარ როსტოსთან ერთად წვეულებაზე გავიცანი, მაგიდასთან გვერდიგვერდ აღმოვჩნდით. ბექა ხუმრობდა, საქორწილო სუფრაა, ჩვენი ქორწილიაო. ამ ხუმრობა–ხუმრობაში განვითარდა ჩვენი ურთიერთობა. 2 წელია ერთად ვართ და ძალიან კარგად ვგრძნობთ თავს, გეგმებზე წინასწარ არასოდეს ვლაპარაკობთ, – ეს სიტყვები ეკომ "სარკესთან" ერთ–ერთ ინტერვიუში თქვა.
ბექას წარსულში უკვე ჰყავდა ოჯახი. მისი პირველი ცოლი ცნობილი ბიზნესმენის, ვანო ჩხარტიშვილის ქალიშვილი იყო, ვისთანაც 8 წლის გოგონა ჰყავს. ეკო გათხოვილი არასოდეს ყოფილა, თუმცა ერთმა და იმავე ადამიანმა სამჯერ მოიტაცა და მისგან სამივეჯერ წამოვიდა.
ეკოსა და ბექას შორი დასრულებული სასიყვარულო ურთიერთობა მეგობრობით არ გაგრძელებულა ფორმალურადაც კი, როგორც ხშირად ხდება ხოლმე. კონფლიქტი ისეთი ღრმა და სერიოზული აღმოჩნდა, რომ წყვილმა ერთმანეთთან კონტაქტი საერთოდ გაწყვიტა.
– ვიცოდი, რომ ადრე თუ გვიან ჩვენი სიყვარული დამთავრდებოდა. დეტალებზე საუბარი არ მინდა, მაგრამ ჩვენი დაშორება იყო ინტერესთა კონფლიქტები და არა – სხვა რამ, თუნდაც მესამე პირი, – უთხრა ეკომ "სარკეს" ამ დაშორების შემდეგ.
...
მართალია, ქართულ შოუბიზნესს ჰოლივუდამდე ბევრი უკლია, მაგრამ მაინც გავიხსენებთ ერთ ლეგენდას ოსკარის "წყევლის" შესახებ: ცნობილია, რომ იმ ვარსკვლავი ქალის ცხოვრება, ვინც ოსკარს მიიღებს საუკეთესო მსახიობი ქალის ნომინაციაში, რადიკალურად იცვლება. აღიარებასთან ერთად, როგორც წესი, ოსკაროსანი ქალები ქმრებს და საყვარელ მამაკაცებს კარგავენ. ეს ისე, ძალიან შორეული პარალელისთვის.
ავთო ჩიტიძე